வாழ்வியல் குறள் - 9

ஆக்கம்: வேதா இலங்காதிலகம்.

டென்மார்க்.

பிறர்க்கு உதவல் 

பிறர்க்கு உதவல் என்பது மனிதனிற்கு 
பிறவியிலேயே வரும் குணம்.

உதவுகிறவனை நன்றி யுணர்வு இன்றி
உதாசீனம் செய்யுமுலகு இது.

திமிர், செருக்குடையோன் தான் பெற்ற 
உதவியை நிமிர்ந்தும் நினைக்கான்.

உதவுவோன் உள்ளம் திறந்தது. எந்தக்

கதவும் போட்டு மூடாதது.

பயன் கருதாது உதவும் மனமும்
பயணிப்பது மரபணுவோடு எனலாம்.

ஏற்ற தருணத்தில் செய்யும் உதவி
மாற்றில்லாத் தங்கத்திற்கு ஈடாகும்.

உதவி செய்தவனைப் பின்னங்காலால் மறந்தும்
உதைப்பவன் மாக்களுள் ஒருவன்.

உதவு! முடிந்தளவு உதவு! சொர்க்கத்தின்
கதவு தானாகத் திறக்கும்.

மன மகிழ்வோடு உதவு! கனதியற்ற
மனத்திருப்தியும், நிறைவும் பெறலாம்.

பெற்ற உதவியை நினைத்து நன்றி 
பேணுமுணர்வு எல்லோருக்கும் வராது.