வாசகர் பக்கம் - ஆன்மீகம்

நவராத்திரி

ஆக்கம்: சு. சண்முகநாதன், டென்மார்க் 

பண்டைய நாகரிகத்திற் சிறந்து விளங்கிய எகிப்திய, பபிலோனிய,  கிரேக்க, உரோம நாடுகளிலும் தாய்த் தெய்வ வழிபாடே சிறந்து விளங்கியதாக உலக வரலாறு கூறுகின்றது. இந்து நதிக்கரை நாகரிகத்திலும் சக்தி வழிபாடு இடம்பெற்றமைக்கான  சான்றுகள் பல உள.

சங்ககாலத் தமிழகத்திலும் மிகப்பழமைவாய்ந்த வழிபாடாக தாய்த் தெய்வ வழிபாடே நிலவியது. இழையணி சிறப்பிற் பழையோள் என கொற்றவை போற்றப்படுகிறாள். இன்றும் தாய்மொழி, தாய்நாடு என சக்தியை போற்றுகின்றோம்.

சக்திக்குரிய விரதங்களுள் நவராத்திரி விரதமும், கெளரி நோன்பும் முக்கியமானவையாகும்.                        

லோக மாதாவாகிய ஆதிபராசக்தி, கிரியாசக்தி,இச்சாசக்தி, ஞானாசக்தி என மூன்றுவித தேவிகளாக, துர்க்கை, இலக்குமி, சரஸ்வதி எனும் நாமங்கள் பூண்டு பிரபஞ்சம் முழுவதற்கும் அருள்பாலிக்கிறாள்.

ஆண்டு தோறும் புரட்டாதி மாதம் பூர்வபக்கப் பிரதமை முதல் நவமி ஈறாக ஒன்பது இரவுகளே நவராத்திரி எனப்படும்.

அவற்றுள் முதல் மூன்று நாட்களும் வீர வாழ்வையளிக்கும் துர்க்காதேவியின் வழிபாடாகும். நடு மூன்று  நாட்களும் பொருட் செல்வத்தைப் பெருக்கும் இலக்குமி வழிபாடாகவும் இறுதி மூன்று நாட்களும்  அறிவுச்செல்வந் தரும் சரஸ்வதி வழிபாடாகவும் அமைகின்றன.

மகாநவமியில் சைவ சமயத்தவர் புத்தக பூசை, ஆயுதபூசைகளை தங்கள் இல்லங்களில் பக்திசிரத்தையுடன் செய்வர்.

பத்தாவது தினம் வெற்றிக்குரிய விஜயதசமி எனப்படும். இத்தினத்தில் ஆரம்பிக்கப்படும் எந்தச்செயலும், இனிது விருத்தி அடையும் என்ற நம்பிக்கையில்  சிறார்களுக்கு ஏடுதொடக்குதல் அல்லது வித்தியாரம்பம் எனப்படும் அரிச்சுவடி எழுத தொடக்கி வைக்கப்படுதலும்  சங்கீதம், நடனம், வாத்தியக்கலைகள் முதலிய கலைகள் பயில ஆரம்பித்தலும் ஆலயங்களிலும்  பாடசாலைகளிலும் ஆசிரியர், அந்தணர் சமூகப்பெரியார் போன்றவர்களினால்  நடாத்தி வைக்கப்படும்.       

அன்னை பராசக்தி மகிஷாசுரனுடன் ஒன்பது நாட்கள் யுத்தம் செய்து, வெற்றி கண்ட பத்தாம் நாள் விஜயதசமி. இந்த வெற்றித் திருநாளன்று வன்னிமரக்கிளை/வாழை வெட்டும் நிகழ்ச்சி ஆலயங்களில் இடம்பெறும். இந்த விஜயதசமி விழா 'தசரா' என வடஇந்தியாவில் சிறப்பாக கொண்டாடப்படுகிறது.

அசுரனை அழித்த சக்திக்கு ஆண்டுதோறும் நன்றி தெரிவிக்கவும், நோயற்றவாழ்க்கை, வலிமை, செளபாக்கியம், செல்வம், ஞானம், கல்வி, ஆற்றல்,  நீண்டஆயுள்  இவற்றைப் பெறவேண்டி ஒன்பது நாட்கள் நவராத்திரி விழாவை இந்து ஆலயங்களிலும், இந்துக்களின் இல்லங்களிலும், கல்விநிலையங்களிலும், சில  காரியாலயங்களிலும், சனசமூகநிலயங்களிலும் கும்பம் வைத்து நவதானியம் விதைத்து சங்கீதம், நடனம், நாடகம், சொற்பொழிவு முதலிய கலை நிகழ்ச்சிகளுடன் இலங்கை இந்தியா தவிர தமிழர்கள் வாழும் புலம்பெயர் நாடுகளிலும் வெகு விமரிசையாக கொண்டாடப்படுகிறது. 


விசேடமாக தென்னிந்தியாவில் கொலு வைக்கும் வைபவமும் முக்கியமாக இடம்பெறும். கொலுவில் மனிதர் விலங்குகள் பறவைகள் போன்ற பல்வேறு பொம்மைகளும், தெய்வத் திருவுருவங்களும் இடம்பெறும். அண்டசராசரம் அனைத்துமாகியுள்ளவள் தேவியே என்பதை இக்கொலு உணர்த்துகின்றது.             

துர்க்கா  சரஸ்வதி இலட்சுமி என நாமங்கள் கொண்ட ஆதிபராசக்தியின் திருவடியினை வணங்கிச் சகல செளபாக்கியங்களும் பெற்றுப் பேரருள் பெறுவோமாக.

 "நம்பினார் கெடுவதில்லை நான்கு மறைத் தீர்ப்பு 

அம்பிகையைச் சரணடைந்தால் அதிகவரம் பெறலாம் "   

மண்ணும், மரமும், மனிதனும். - அத்தியாயம் 2

ஆக்கம்: இ.சொ.லிங்கதாசன்

'கிழக்குச் சீமையிலே' என்ற அந்த அற்புதமான திரைக் காவியத்தில், மற்றுமொரு பாடல் காட்சியில், படத்தின் பிரதான கதாநாயகி 'ராதிகா' திருமணமாகிப் புகுந்தவீடு செல்லும் காட்சியில் அவள்(கதாநாயகி) அனைவருக்கும் 'சென்றுவருகிறேன்' என்று பதில் சொல்லிப் போவதாக அமைந்த பாடலாகிய "வண்டிமாடு எட்டுவச்சு முன்னே போகுதம்மா' என்ற பாடலில் வரும் வரிகள் கேட்போரை மட்டுமல்ல, தங்கைகளோடு கூடப்பிறந்த அண்ணன்கள் அனைவரையுமே கண்கலங்க வைத்தன. இதோ கதாநாயகி அனைவரிடமும் விடைபெறும் பாடல் காட்சி உங்களுக்காக:

பாடலைப் பார்த்தும், கேட்டும் நெகிழ இங்கே அழுத்தவும்.

அந்தப் பாடலில், நமது மண்ணும் மரமும், மனிதனும் என்ற தலைப்போடு தொடர்புபட்ட பின்வரும் வரிகளைப் பார்ப்போம்.

அவள் கூறுகிறாள்:
"அண்ணே போய்வரவா, அழகு போய்வரவா,
மண்ணே போய்வரவா, மாமரமே போய்வரவா,
அணில்வால் மீசவச்ச அண்ணே உன்னைவிட்டு,
புலிவால் மீசவச்ச புருசனோட போய்வரவா"
என்ற வரிகள் கேட்போர் உள்ளங்களை எல்லாம் கொடிய வாள்கொண்டு அறுத்தன. இதில் அவள் கேட்போரை நெகிழவைக்கும் விதமாக அப்படி என்னதான் கூறுகிறாள்?
சிறுவயது முதலே தாய்,தந்தையில்லாமல் வளர்ந்த அவளைக் 'கண்ணை இமைகாப்பதுபோலக் காத்த' அண்ணனுக்கு விடை கூறுகிறாள், "அண்ணே போய்வரவா"
அதற்கடுத்ததாக அவளது வரிசைக்கிரமத்தில் இடம்பிடித்திருப்பது அவளது நெடுநாள் சிநேகிதியாகிய 'அழகு' என்பவள். அறிவு தெரிந்த காலத்திலிருந்தே அவளோடு ஒட்டி உறவாடிய, 'கெந்தியடித்தல்' முதல் 'பல்லாங்குளியாடுதல்'  வரை அவளுடனேயே வாழ்வின் பெரும்பகுதியைக் கழித்த 'அழகு' என்ற சிநேகிதியைப் பார்த்துக் கூறுகிறாள் "அழகு போய்வரவா" என்று. அதற்கடுத்தாற்போல் தான் பிறந்தது முதல் இன்றுவரை 'ஆடி,ஓடி, விளையாடிப் புரண்ட, தனக்குச் சோறளித்த, வாழ்வளித்த தன் மண்ணுக்குக் கூறுகிறாள் "என் மண்ணே போய்வரவா" என்று. உடன்பிறந்தவனையும், உயிர் நண்பியையும், தன் மண்ணையும் மட்டும் அவள் நேசித்தவளா? இல்லவே இல்லை, மனிதர்கள் எல்லாம் அடுத்த மனிதர்களை 'உணர்ச்சியிலாதவர்' என்று இழித்துரைப்பதற்கு பயன்படுத்தும் சொல் 'மரம்' என்பதுதான். அந்த மரத்திலே, மனித வாழ்க்கையின் பல அத்தியாயங்களோடு தொடர்புடைய மாமரத்தின் மீதுகூட அவள் உணர்ச்சிபூர்வமான உள்ளன்பு வைத்திருந்தாள் அதனால்தான் அவள் தன் முற்றத்து மாமரத்தையும் மறக்காமல் கூறுகிறாள் 'மாமரமே போய்வரவா'

(அடுத்த வாரமும் தொடரும்)

உங்கள் கருத்துக்களும் வரவேற்கப்படுகின்றன.

'கிறிஸ்தோபர் கொலம்பஸ்' சாதனையாளனா, கொடியவனா? அத்தியாயம் 3

ஆக்கம்: இ.சொ.லிங்கதாசன்

கொலம்பஸ் தனது நண்பன் அன்டோனியோவிடம், தனது நீண்டகால உள்ளக் கிடக்கையை வெளியிட்டான். "நண்பா அதோ தூரத்தில் தெரிகிறதல்லவா 'பல்மாரியா' தீவு, அந்தத் தீவுக்கு நாமிருவரும் ஒரு சிறிய படகுப்பயணம் செய்துவிட்டுத் திரும்பிவிடுவோம், தீவு ஒன்றும் அவ்வளவு தூரமில்லை, நம்மால் முடிந்தளவு துடுப்பால் வலிப்போம், அதற்கப்பால் காற்றுவீசும் திசைக்கேற்ப ஒரு பாய்மரத்தையும், பாயையும் உபயோகிப்போம்" என்றான். தனது நண்பன் கொலம்பஸின் இந்தத் திட்டத்தைக் கேட்ட அன்டோனியோ, ஒருகணம் திகைத்துப் போய்விட்டான். 'துடுப்பு வலித்தல்', 'பாய்மரம்', பாய்' போன்ற வார்த்தைகள் அவனுக்கு அந்நிய மொழி வார்த்தைகள்போலக் காதில் விழுந்தன, அதுமட்டுமன்றி அந்தச்சிறுவன் நடுங்கிப்போனதற்குப் பல காரணங்கள் இருந்தன. 1. அவர்களிருவரும் கடற்கரையில் கட்டுமரங்களில் மட்டுமே படகுப்பயணம் செய்து பயிற்சி பெற்றுள்ளார்கள், ஆனால் 'பல்மாரியா' தீவு, மிகவும் ஆழமான கடலைத்தண்டி வெகுதொலைவில் இருந்தது(உண்மையில் பல்மாரியா தீவு அவர்களது ஜெனோவா கடற்கரையிலிருந்து 20 மைல்கள் தொலைவிலேயே இருந்தது ஆனால் அந்தச் சிறுவனாகிய அன்டோனியோவுக்கு அது நூற்றுக்கணக்கான மைல்கள் தொலைவுபோலத் தென்பட்டது) 2. கொலம்பஸ் பயணம் செய்யத் திட்டமிட்ட அந்தப் 'பல்மாரியா' தீவில் பேய்களும், பூதங்களும், ராட்சத முதலைகளும் அல்லது 'டிராகன்களும்' (வேதாளங்கள்) வாழ்வதாகவும் பேசப்பட்டதை அன்டோனியோ நன்கு அறிவான். உண்மையில் இவைகள் எல்லாம் கட்டுக்கதைகளே என்பதை அந்த அப்பாவிச் சிறுவர்கள் அறியர். இடைநடுவில் மேற்படி 'பல்மாரியா' தீவைப் பற்றியும், மேற்படி பயமூட்டும் கட்டுக்கதைகளுக்கான பின்னணிகளையும் சிறிது பார்ப்போம்.

'பல்மாரியா தீவு' (PalMaria Island)

'பல்மாரியா' என்ற இத்தாலிய வார்த்தைக்குத் தமிழில் 'பனைமரம்' என்று அர்த்தம். ஆகவே மேற்படி தீவானது 'பனைமரத்தீவு' என்று பொருள் கொள்ளப்பட்டது. பனைகளே இல்லாத ஐரோப்பிய மண்ணில் பனைமரத்தீவு எப்படி இருக்கமுடியும்? அதாவது ஐரோப்பியர்கள் பனையைப் போல தோற்றமளிக்கும் கடற்கரையோர தாவரமாகிய, ஒரு தாவரத்தை (பேரீச்சமரம் அல்லது ஈச்சம்பற்றை போலக் காட்சியளிக்கும்) பல்மைரா(palmyra) அல்லது பாம்(palm) என்றே அழைக்கின்றனர். மேற்படி தீவில் அந்தத் தாவரங்கள் அதிகம் காணப்பட்டதால் அது 'பல்மாரியா தீவு' என்று அழைக்கப்பட்டது. மேற்படி தீவில் பகலில் மீனவர்களும், இரவில் கடற்கொள்ளையர்களும் தங்குவது வழக்கம். கடற்கொள்ளையர்கள் தங்களது நடவடிக்கைகளுக்கு இடைஞ்சலாக மீனவர்கள் எவரும் அந்தத் தீவிற்கு வரக்கூடாது என்பதற்காகவே இவ்வாறு பேய்கள், பூதங்கள் பற்றி கட்டுக்கதைகளைப் பரப்பியிருந்தனர்.
பி.கு.: தற்காலத்தில் மேற்படி தீவு இத்தாலிக்கு அதிக வருமானம் பெற்றுத்தரும் உல்லாசப் பயணிகள் தீவாக விளங்குகிறது.

கொலம்பஸின் கேள்வியால் மிரண்டு போய்விட்ட சிறுவன் அன்டோனியோ தனது பயத்தை வெளியே காட்டாமல், தற்காலச் சிறுவர்கள் போலவே ஒரு நடிப்பை அரங்கேற்றினான். அதாவது தனக்குக் கடுமையான வயிற்றுவலி ஏற்பட்டிருப்பதாகவும், தான் உடனடியாகத் தனது அன்னையிடம் செல்லவேண்டும் என்றும் கொலம்பசிடம் கூறியவன், அந்த இடத்தைவிட்டே ஓடிப்போய்விட்டான்.

(அடுத்த வாரமும் தொடரும்)

உங்கள் கருத்துக்களும் வரவேற்கப்படுகின்றன. 

நித்தம் நித்தம் நெல்லுச்சோறு - அத்தியாயம் 3

ஆக்கம்: இ.சொ.லிங்கதாசன்

'செட்டிநாடு உணவகங்கள்' எல்லாமே சுத்தத்திற்கு முக்கியத்துவம் கொடுப்பவையா? இதுதான் நான் திரு.பழனிச்சாமி அவர்களிடம் கேட்ட அடுத்த கேள்வி. அவர் கூறினார்: "உலகில் நூற்றுக்கு நூறு வீதம் பூரணமானவர் என்றோ (perfect person), தவறே செய்யாதவர் என்றோ யாரையும் காட்ட முடியாது. அதேபோல் ஆங்காங்கே சில தவறுகள் நிகழலாம், இருப்பினும் நானறிந்தவரை செட்டிநாடு உணவகங்கள் சுத்தத்திற்கு முக்கியத்துவம் கொடுப்பவை. இதில் இன்னும் சில தகவல்களையும் குறிப்பிட்டாகவேண்டும். ஒரு காலத்தில் தமிழகத்தில் மட்டுமன்றி, வெளிநாடுகளிலும் செட்டிநாட்டவர்கள் மட்டுமே 'செட்டிநாடு மெஸ்' அல்லது 'செட்டிநாடு ரெஸ்டோரன்ட்' நடத்தி வந்தார்கள். ஆனால் அண்மைக் காலமாக பல புதிய செட்டிநாட்டு உணவகங்கள் உலகம் முழுவதும் தோன்றி விட்டன. இவற்றில் சிலவற்றின் பின்னணியை ஆராய்ந்து பார்த்தால், அவைகளை நடத்துபவர்களுக்கும் 'செட்டிநாட்டுக்கும்' எவ்வித சம்பந்தமும் இருக்காது. வெறுமனே பெயர்ப் பிரபலத்திற்காக அவ்வாறு வைத்திருக்கிறார்கள், இது ஒரு வகை ஏமாற்றுவேலை" என்றார்.

"அப்படியானால் செட்டிநாட்டைச் சாராதவர்கள், அந்தப் பெயரில் உணவகம் ஆரம்பித்தால்  
அதைப் போலித்தயாரிப்பு(duplicate) என்றோ, அல்லது செட்டிநாட்டு உணவகம் என்ற நல்ல பெயரில் ஏற்பட்ட கலப்படம் என்றோ கூறலாமா? இது எனது அடுத்த கேள்வியாக இருந்தது. அவர் தொடர்ந்தார், "பல உணவகங்களுக்கும்(உதாரணமாக : KFC, MC Donalds, Pizza Hut), பல பொருட்களின் வியாபாரப் பெயர்களுக்கும்(உதாரணமாக Addidas, Nike,Nokia), ஏன் புத்தகங்களுக்குக் கூட காப்புரிமையோ(copyright), அல்லது தயாரிப்பு உரிமையோ(patent right) உள்ளன. ஆனால் இந்தச் செட்டிநாட்டு உணவகங்களுக்கு எந்தவிதமான தயாரிப்பு உரிமையும்(patent right) கிடையாது. யார் விரும்பினாலும் 'செட்டிநாடு உணவகம்' என்ற பெயரில் உணவகமொன்று ஆரம்பிக்கலாம். இது ஒரு துரதிர்ஷ்டமான நிலை" என்றார்.

"அப்படியானால் செட்டிநாட்டு மக்கள் சேர்ந்து அப்படி ஒரு உரிமையை வாங்கலாம் அல்லவா"? இது எனது அடுத்த கேள்வி. அவர் தொடர்ந்தார், "வாங்கியிருக்கலாம், வாங்கலாம், செய்திருக்கலாம். ஆனால் யாருமே முயற்சி செய்யவில்லை, 'பூனைக்கு மணிகட்டுவது யார் என்ற கேள்விதான் ஞாபகத்திற்கு வருகிறது, இவ்வாறான அக்கறையின்மையால் பல அபாயங்களும் உள்ளன" என்றார். அபாயங்களா? என்றேன் நான் குழப்பத்துடன். அவர் தொடர்ந்தார், " ஆம் அபாயங்கள்தான், கடந்த 1997 செப்டம்பரில் 'இந்தியாவின் பாரம்பரியச் சொத்தாகிய 'பாசுமதி' அரிசியை' சர்வதேசச் சந்தையிலும், சர்வதேசப் 'patent' உரிமைக் கழகத்திலும், அமெரிக்கா தனது சொத்து என்று வழக்குத் தொடர்ந்ததை உதாரணமாகக் கூறலாம்.
"என்னது, அரிசிக்கு அமெரிக்கா சொந்தம் கொண்டாடியதா"? என்றேன் வியப்பு மேலிட.

(அடுத்த வாரமும் தொடரும்)

உங்கள் கருத்துக்களும் வரவேற்கப்படுகின்றன.

நாடுகாண் பயணம் - அல்ஜீரியா

நாட்டின் பெயர்: 
அல்ஜீரியா 


முழுப்பெயர்:
அல்ஜீரிய மக்கள் ஜனநாயகக் குடியரசு


அமைவிடம்: 
ஆபிரிக்கக் கண்டம் 


தலைநகர்: 
அல்ஜியர்ஸ் 

நாட்டு எல்லைகள்: 
வடகிழக்கு - துனீசியா 
கிழக்கு - லிபியா 
மேற்கு - மொராக்கோ 
தென்மேற்கு - மேற்கு சகாரா, மவுரிட்டானியா, மாலி 
தென்கிழக்கு - நைகர்
வடக்கு - மத்திய தரைக்கடல் 


நாட்டு மொழிகள்: 
அரபி, தமாசைட் & பிரெஞ்சு 


சமயம்: 
80% முஸ்லீம்கள், 20% கிறீஸ்தவம்(புரட்டஸ்தாந்து), மிகச்சிறிய அளவில் யூதர்கள்.


கல்வியறிவு: 
70% 


சனத்தொகை: 
ஏறக்குறைய 3 கோடியே 48 லட்சம் (2010 மதிப்பீடு)


நாட்டின் பரப்பளவு: 
2,381,741 சதுர கிலோ மீட்டர்கள்


அரசாங்க முறை: 
பாராளுமன்ற மற்றும் ஜனாதிபதி முறை.


ஜனாதிபதி: 
அப்தல் அசீஸ் பூட்டபிளிக்கா 


பிரதமர்: அகமத் அவ்யாஹியா 


நாணயம்: 
அல்ஜீரியன் தினார் 


சர்வதேசத் தொலைபேசிக் குறியீடு: 
00-213 

பிரான்சிடமிருந்து சுதந்திரமடைந்த திகதி:
1962ஆம் ஆண்டு, ஆடி மாதம் 5ஆம் திகதி 

இந்நாட்டின் பிரதான ஏற்றுமதிப் பொருட்கள்:
பருத்தி, புகையிலை, ஒலிவ் எண்ணை/காய் , கோதுமை, பார்லி, ஓட்ஸ், பழங்கள், காய்கறிகள்.

கனிய வளங்கள்:
நிலக்கரி, பெற்றோலியம், எரிவாயு.

நாட்டின் பெருமைகளில் சில:
மத்திய தரைக்கடலில் உள்ள மிகப்பெரிய நாடு என்ற பெருமையும்,
ஆபிரிக்கக் கண்டத்தில், சூடானுக்கு அடுத்தபடியாக ஆபிரிக்காவின் இரண்டாவது பெரிய நாடு என்ற பெருமையோடு,
உலகில் உள்ள மிகப்பெரிய நாடுகளின் வரிசையில் 11 ஆவது இடத்திலும் உள்ளது.

கல்விப்பெருமை:
நம் நாட்டவர்கள், ஒக்ஸ்போர்ட், கேம்பிரிட்ஜ் பல்கலைக் கழகங்களைப் புகழ்ந்து பேசுவது போல, அராபியர்கள் மற்றும் மத்திய கிழக்கு நாட்டு மக்கள் அல்ஜீரியப் பல்கலைக் கழகங்களைப் புகழ்ந்து பேசுவர்.

சரித்திரக் குறிப்பு:
துருக்கியால் உருவாக்கப்பட்ட 'ஒட்டோமான்' இராச்சியத்தில் அல்ஜீரியா ஒரு பகுதியாக இருந்தது.
மிகப்பெரிய அளவில் அடிமைகள் வர்த்தகத்தில் ஈடுபட்ட ஆபிரிக்க நாடு.
அன்றுமுதல் இன்றுவரை மிகப்பலமான ஒரு இராணுவ பலமுள்ள ஆபிரிக்க நாடு.
பிரான்ஸ், ஸ்பெயின், இங்கிலாந்து நாடுகளால் ஆளப்பட்டது.
17 ஆம் நூற்றாண்டு வரை அல்ஜீரியர்கள் மிகப்பெரும் கடற் கொள்ளையர்களாக இருந்து, ஐரோப்பிய நாடுகளுக்குப் பெரும் சவாலாக விளங்கினர்.
இந்நாடு சீனா மற்றும் ரஷ்யாவிற்கு நேசநாடு.

முதல் பரிசு மூன்று கோடி - அத்தியாயம் 3

ஆக்கம்: இ.சொ.லிங்கதாசன்

தண்ணீர், மின்சாரம், வெப்பமேற்றிகள் இம்மூன்றையும் சிக்கனமாகப் பாவிப்பதால், வருடாந்தம் பல ஆயிரக்கணக்கான, அமெரிக்க டொலர்களைச், சேமிக்க முடியும் என்று பார்த்தோம். இவற்றில் முதலிடத்தில் உள்ளதும் முக்கியமானதுமாகிய தண்ணீரைப் பற்றிப் பார்ப்போம்.

தமிழ்த் திரைப்படங்களுக்கென்றே சில காட்சியமைப்புச் சம்பிரதாயங்கள் உள்ளன. கதாநாயகனுக்கும், நாயகிக்கும் மோதலுக்குப் பின்தான் கண்டிப்பாகக் காதல் வரும், அதுபோல் கதையில் வரும் மருத்துவர், நமக்கு முன்பின் கேட்டறியாத ஒரு நோயின் பெயரைக்கூறி அது லட்சத்தில் ஒருவருக்குத்தான் வரும் என்று கூறி நம்மையும் கலங்க வைப்பார். படம் முடிவுறும் தருணத்தில்தான் காவல்துறை அதிகாரி(Inspector) குற்றவாளியை நோக்கி mr.......you are under arrest (திரு.....) அவர்களே, நீங்கள் கைது செய்யப்படுகிறீர்கள்) என்பார்.  இவற்றை எல்லாம் விட நம்மைக் கலங்க வைக்கும் ஒரு காட்சி ஏராளமான தமிழ்ப் படங்களில் இடம்பெற்றிருக்கும். அக்காட்சி இதுதான்: கதாநாயகனோ, நாயகியோ, அவர்களின் பெற்றோர்களோ, அல்லது கதைக்கு மிகவும் வேண்டப்பட்ட பாத்திரமோ, நோயினாலோ, விபத்தினாலோ, அல்லது கத்தியால் குத்தப் பட்டோ உயிருக்குப் போராடிக்கொண்டிருக்கும் தருணத்தில் "தண்ணீர்,தண்ணீர்" என்பார்கள். அருகில் நிற்கும் உரியவர்கள் ஓடிச்சென்று தண்ணீர் எடுத்து வருவதற்கிடையில் சம்பந்தப்பட்டவரின் உயிர் போய்விடும்.
இத்தகைய காட்சிகளைப் பார்க்கும்போது என்மனதில் ஒரேயொரு எண்ணவோட்டம் ஏற்படும். அது இன்னும் ஒருசில நூற்றாண்டுகளில் இந்த மனித இனமே தண்ணீர்ப் பஞ்சத்தினால் மடியப்போகின்ற நிலை வரப்போகிறதே, இதைத் தடுக்க முடியாதா? ஏன் இதைப்பற்றி யாரும் அவ்வளவாகப் பேசுவதில்லை. "அடுத்தடுத்த நூற்றாண்டுகளில் வாழப்போகிற மக்களைப் பாதிக்கப் போகிற பிரச்சினை என்பதால், இந்தத் தலைமுறையினர், இதனைக் கருத்தில் எடுக்கவில்லைப் போலும்".

ஆனால் அந்த எண்ணமும் தவறானதே, ஏனெனில் சூரியனில் வெப்பநிலை  குறைவடைந்து செல்வதால், இன்னும் ஐம்பதாயிரம் வருடங்களில் சூரியன் முற்று முழுதாகத் தனது வெப்பத்தை இழந்து, குளிர்வடைந்து போகப்போகிறது என்பதால், இன்னும் ஐம்பதாயிரம் வருடங்களில் இந்தப் பூமியில் எந்தவிதமான உயிரினங்களுமே வாழமுடியாது போகும் நிலை ஏற்படப்போகிறது என்று சிந்திக்கும் விஞ்ஞானிகள், இன்னும் ஒரு முப்பது, நாற்பது வருடங்களில் பூமியில் பெற்றோலியப் பொருட்கள்  எல்லாம் அருகிப் போய்விடும் என்பதால், பெற்றோலியத்திற்கு மாற்றீடு கண்டு பிடிப்பதில் மும்முரமாக ஈடுபட்டிருக்கும் விஞ்ஞானிகள் கூட்டமும், அரசியல் வாதிகள் கூட்டமும், இந்த நூற்றாண்டில் வாழுகின்ற மக்களின் வாழ்வாதாரத்தையே கேள்விக்குள்ளாகியிருக்கும் தண்ணீர்ப் பஞ்சத்தைப் பற்றியே பேசாதிருப்பது ஏன்???

"மூன்றாவது உலக யுத்தமானது, தண்ணீருக்கான போட்டியால்தான் ஏற்படும்" என்று ஒரு அறிஞன் கூறினானே, அதை யாரும் காதில் வாங்கியதாகத் தெரியவில்லையே.

(அடுத்த வாரமும் தொடரும்)

உங்கள் கருத்துக்களும் வரவேற்கப்படுகின்றன.

'எந்தக் குழந்தையும்' - அத்தியாயம் 2

ஆக்கம்: இ.சொ.லிங்கதாசன்

குழந்தை வளர்ப்பைப் பற்றிக் கவிஞர்.புலமைப்பித்தன் ஒரு பாடலிலேயே சுருங்கக் கூறி விளங்கவைத்த சிறப்பைக் கடந்தவாரம் பார்த்தோம். இவ்வாரத்திலிருந்து, குழந்தை வளர்ப்பைப் பற்றி நிபுணர்களும், உளவியல் ஆய்வாளர்களும் கூறும் கருத்துக்களையும் சிறிது கவனிப்போம்.

முதலில் ஒரு நல்ல குழந்தை இந்தப் பூமியில் பிறப்பதற்கு முன்னால் உள்ள, காலப்பகுதியாகிய, தாயின் கருவறையில் இருக்கும் காலப்பகுதியையும், அந்தப் பத்து மாதத்திற்குட்பட்ட காலத்தில் அக்குழந்தையின், தாயும், தந்தையும் கடைபிடிக்க வேண்டிய சில நடைமுறைகளைப் பற்றியும் பாப்போம்.

குழந்தை வளர்ப்பைப் பற்றி பல ஆராய்ச்சிகளையும், ஆராய்ச்சிமுடிவுகளைப் பற்றிய கட்டுரைகளையும், பத்திரிகைகள் வெளியிடத்தொடங்கி சுமார் நாற்பது வருடங்களுக்கு மேலாகிறது. குழந்தைவளர்ப்புக் கலை பற்றிப் பாலர் பள்ளி தொடங்கிப் பல்கலைக் கழகம் வரை விவாதத் தலைப்புக்கள் நீண்டுகொண்டே செல்கின்றன. இருப்பினும் நம்மில் பலருக்குக் குழந்தையானது தன் தாயின் கருவில் இருக்கும்போதே, அதன் குழந்தைப் பருவம் தொடங்கிவிட்டது என்பது தெரிவதில்லை. தாயின் கருவில் இருக்கும் சிசுவை அது ஒரு சதையாலான சடப் பொருளாக எண்ணும் நிலை இன்றுவரை தொடர்கிறது.
ஆனால் விஞ்ஞானிகள் சொல்வதெல்லாம், பிறந்த குழந்தைக்கு எத்தகைய முக்கியத்துவம் கொடுக்கிறீர்களோ, அதைவிடப் பலமடங்கு முக்கியத்துவத்தை அது தன் தாயின் வயிற்றில் கருவாக இருக்கும்போதே கொடுங்கள் என்பதுதான்.

குழந்தை கருவாக இருக்கும்போது அதன் பெற்றோர் அதிலும் முக்கியமாகத் தாயானவள் கவனிக்க வேண்டிய நடைமுறைகளைப் பற்றிப் பார்ப்போம்.


கர்ப்பகாலம் 1 தொடக்கம் 10 மாதங்கள் வரை கடைப்பிடிக்க வேண்டியவை.

1. தான் கருவுற்ற விடயமானது இந்தப் பூமியின், மற்றும் இயற்கையின் வியப்பான செயற்திட்டங்களில் ஒன்று என எண்ணுதல் வேண்டும்.

2. இந்தப் பூமியில் மனித இனத்திற்கு தனது பங்களிப்பை இயற்கையும், பிரபஞ்ச சக்தியும் எதிர்பார்ப்பதாலேயே, இந்தக் கருவானது, தனது கருப்பையில் உருவாகியுள்ளது என்று பெருமித உணர்வு தாய்க்கு வரவேண்டும்.

3. கருவில் உருவாகியுள்ள சிசுவை ஒரு ஆரோக்கியமுள்ள, திறமைகளுள்ள, அறிவுமிக்க குழந்தையாகப் பெற்றுக் கொடுக்க வேண்டிய கடமை தனக்குள்ளது என்பதை அவள் உணர வேண்டும்.

(அடுத்த வாரமும் தொடரும்)

உங்கள் கருத்துக்களும் வரவேற்கப்படுகின்றன.