அந்திமாலை

ஞாயிறு, நவம்பர் 03, 2013

இன்றைய பொன்மொழி

மூத்தோர் சொல்

புகழுக்காக நேர்மையை மறந்து விடக் கூடாது;

உறவுகளுக்காக நீதியை மறந்து விடக் கூடாது.

வாய்ப்புகளுக்காகத் தன்மானத்தை விட்டுவிடக் கூடாது.

சனி, நவம்பர் 02, 2013

குறள் காட்டும் பாதை

இன்றைய குறள்

அதிகாரம் 91 பெண்வழிச் சேறல்

மனைவிழைவார் மாண்பயன் எய்தார்; வினைவிழைவார்

வேண்டாப் பொருளும் அது. (901)

பொருள்: மனைவியை விரும்பி அவள் சொன்னபடி நடப்பவர் சிறந்த பயனை அடைய மாட்டார்; கடமையைச் செய்ய முடியாதவர் ஆவார்.

உலக வாழ்க்கையில் எல்லோருக்கும் அளவில்லாத கஷ்டங்கள் உண்டாகத்தான் செய்யும். பணக்காரன், பெரிய பதவியில் உள்ளவன் கஷ்டமில்லாமல் இருப்பதாக மற்றவர்கள் நினைக்கலாம். ஆனால்,அவர்களைக் கேட்டால் தெரியும். அவர்களுக்கு எவ்வளவு கஷ்டங்கள் என்று. நாம் திண்ணையில் இருக்கிறோம், விழுந்தால் சிராய்த்துக் கொள்வதோடு போய்விடும். அவர்கள் மேல்- மாடியில் இருக்கிறார்கள். விழுந்தால் எலும்பு முறிந்து விடும். பிராணனுக்கே(உயிருக்கே) ஆபத்து வரலாம்
மனுஷனாகப் பிறந்த ஒவ்வொருவனும் ஓயாமல் அலைச்சலான அலைச்சல் அலைந்து கொண்டு இருக்கிறான். எதற்காக ? ஆசைகளைப் பூர்த்தி செய்து கொள்வதற்குத்தான்.
வெளியிலிருக்கும் வஸ்துக்களிடம் இவனுக்கு ஆசை; ஒன்று கிடைத்துவிட்டால் அது போதவில்லை. அதனால் வரும் சுகம் தீர்ந்து போகிறது. மற்றொன்றுக்கு ஆசைப்படுகிறான். அதைத்தேடி ஓடுகிறான். இவனுக்கு சாந்தி என்பதே ஒரு நாளும் இல்லாமலிருக்கிறது.

தீபாவளி - ஏன்? எதற்கு?

ஆக்கம்: இ.சொ. லிங்கதாசன்

இன்றைய தினம் உலகம் முழுவதுமுள்ள இந்துக்கள் தீபாவளித் திருநாளை வெகு விமரிசையாகக் கொண்டாடுகிறார்கள். அவர்களது மகிழ்ச்சியில் 'அந்திமாலையும்' பங்குகொள்கிறது. அத்துடன் இந்தப் பண்டிகையின் பின்னணி, மற்றும் தோற்றம் பற்றி ஆராய்வதே இக்கட்டுரையின் நோக்கமாகும். இந்து சமயத்தவர் ஒருவரிடம் தீபாவளி எதற்காகக் கொண்டாடப் படுகிறது? என்று கேட்டால் "கிருஷ்ண பரமாத்மா, நல்லோர்களைக் காப்பதற்காக 'நரகாசுரனை' அழித்தபோது, அவன் இறக்கும் தருணத்தில் கிருஷ்ண பரமாத்மாவிடம் ஒரு வேண்டுகோள் விடுத்தான் என்றும், அவ்வேண்டுகோளில் "நான் மடிந்த தினத்தை மக்கள் எல்லோரும் மகிழ்வாகக் கொண்டாட வேண்டும்" என்றும் கோரியிருந்தான், அதன்படியே மக்கள் காலங்காலமாக இப்பண்டிகையை கொண்டாடி வருகிறார்கள் என்று கூறுவார்.

உண்மை அதுவா? அந்த ஒரேயொரு ஐதீகம் காரணமாகத்தான் இப்பண்டிகை கொண்டாடப் படுகிறதா? என்ற கேள்விக்கு எனக்குக் கிடைத்த விடையை தகவல் திரட்டாக வாசகர்களுடன் பகிர்ந்து கொள்கிறேன்.

தீபாவளி, ஐப்பசி மாதத்தில் அமாவாசைக்கு முன் தினம் வரும் நரக சதுர்த்தசி திதியில் கொண்டாடும் ஓர் இந்து பண்டிகையாகும். இந்துக்கள் மட்டுமின்றி சீக்கியர்களும், சமணர்களும் கூட இப்பண்டிகையை வெவ்வேறு காரணங்களுக்காக கொண்டாடுகின்றனர். தைப்பொங்கலை இந்துக்கள் தவிர்ந்த ஏனைய மதத்தவர்களான தமிழர்களும் முக்கிய பண்டிகையாகக் கருதுவதுபோல் 'தீபாவளி' கருதப்படுவதில்லை. இது முழுக்க முழுக்க ஒரு இந்துப் பண்டிகை என்பதால் இந்து சமயத்தைச் சேர்ந்த தமிழர்களாலும், இந்தியாவின் வட மாநிலங்களிலுள்ள இந்துக்களாலும் வெகு விமரிசையாகக் கொண்டாடப் படுகிறது.அதேபோன்று மலேசியா மற்றும் சிங்கப்பூரில் வாழும் தமிழர்களும் தீபாவளியைக் கோலாகலமாகக் கொண்டாடுகின்றனர். புலம்பெயர் மக்கள் மத்தியில் இப்பண்டிகை குறிப்பிடத்தக்க முக்கியத்துவம் பெறவில்லை.

'தீபாவளி' பெயர்க் காரணம்:

'தீபம்' என்றால் ஒளி அல்லது விளக்கு. 'ஆவளி' என்றால் வரிசை. வரிசையாய் விளக்கேற்றி, இருள் நீக்கி, ஒளி தரும் பண்டிகையே தீபாவளி ஆகும். தீபத்தில் பரமாத்மாவும், நெருப்பில் ஜீவாத்மாவும் வாசம் செய்து அருள் தருவதாய் ஐதீகம். ஒவ்வொருவர் மனதிலும் ஒரு சில 'இருள்' உள்ளது. அகங்காரம், பொறாமை, தலைக்கனம் போன்ற எதையாவது ஒன்றை அகற்ற வேண்டும். ஒரு தீய குணத்தை இந்நாளில் எரித்துவிட வேண்டும் என்பதே பொருளாகும்.